وصفتهما بـ«مخدماتية الأستاذة».. القصة الكاملة لـ«خناقة» مها أحمد مع عائلة «السقا» وأمير كرارة (صور)

شهدت الساعات الماضية حربًا نارية من التصريحات بين كل من الفنانة مها أحمد، و"فاطمة" شقيقة الفنان أحمد السقا ووالدته "نادية السروجي"، وذلك بعد حديث الأولى عن مسلسل "نسل الأغراب"، الذي عرض بالموسم الرمضاني الماضي، وكان بطولة أمير كرارة وأحمد السقا.

وانتقدت "مها" كل من "أمير، وأحمد"، دون أن تذكر أسمائهما بشكل صريح، وقالت إنهما قبلا الرضوخ للمخرج محمد سامي، وأساء لأنفسهما من أجل إرضاء زوجته الفنانة مي عمر في المسلسل.

وكتبت عبر حسابها على موقع التواصل الاجتماعي "فيس بوك": "عوضي  على الله دى الجملة اللى دايما بقولها لما اتصدم في أشخاص، الحكاية يا سادة نجمين عملوا مسلسل واتنجمت عليهم بنوتة لسه ألف باء تمثيل واديتهم على قفاهم وركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم إن طول عمرهم مبيعملوش كده مع أي زميلة لهم أقربها أنا".

أضافت: "النجم الأولاني بينى وبينه عيش وملح وزمالة، رشحت في مسلسل بطولته وكان بيقنعني بدور ولما وافقت بعتولي دور تاني معرفوش، دور متعملوش واحدة مبتدئة، المفروض إنه عارف قيمتى الفنية وعارف إنى إضافة له، اتهرب مني وموقفش جنبى وباعني رغم إن الكل عارف إنى زي أخته.. ندل".

وتابعت قائلة: "التانى كان في بداياته يتمنى يسلم عليا ويقولى يا أستاذة، نزلت من نفسى وقلتله مش هنشتغل مع بعض ما هى الحوجة مرة، رد وقالى الدور بينادي صاحبه طبعا محتلكوش قد ايه ندمت نفسى وعشت أسود أيام حياتى عياط واكتئاب وقلت عوضى عليك يا رب».

واستكملت: "تمر الأيام والاتنين يعملوا ويتجمعوا مع بعض في مسلسل واحد (على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوتة سنة أولى تمثيل وخبرة ويتحول المسلسل والدعاية الدراما كاملة لصالحها وهما (مخدماتية للأستاذة)".

واختتمت: "يمهل ولا يهمل، ابدأوا من جديد يا أوفر تمثيل ياللى مبتقروش يا كمبارس جنب النجمة. نصيحة بلاش تتشطروا على اللى كان بينكم وبينهم عيش وملح بلاش تتشطروا على أساتذتكوا. عوضنا على الله. يارب متحوجنا لحد حتى ولو كان أقرب الناس لينا".

من جانبها، لم تصمت فاطمة السقا على كل هذا الهجوم على شقيقها "أحمد"، وردت عليها قائلة: ": "الكلام ده موجه ليكى يا أستاذة بدل ما تفضلى تمسحى ردى كل شوية.. أبهرتينى يا مها بأخلاقك العالية.. وبأنك افتكرتى العيش والملح اللى كلتيه في البيت بتاع الفنان اللى مش عارفة تقولى اسمه بس عرفتى تقولى عليه (ندل)، اللى هو أحمد السقا. بس أنا بقولك قدام الناس قطع لسان أي حد يقول عليه كده لأنه راجل أكرمك ووقف جنبك انتى ومجدى بدل المرة ألف".

وأضافت: "أمير كرارة بردو راجل جدع ومحترم للى ما يعرفهوش في البوست بتاعك ده.. معرفش ايه الفرص اللى كانت عندك اللى كان يتمنى يشتغل معاكى فيها زمان بس هو أي حد يتمنى يشتغل معاه دلوقتى أكيد.. وكلمة الدور بينادى صاحبه دى بتاعة أفلام.. ما بتتقالش في الحقيقة.. كفايا دراما وتشويه للناس".

وتابعت: "وبعدين هما كممثلين مش مطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج.. الحقيقة أنا مش عارفة أنتى عايزة ايه.. أنا مش شايفة بعد العشرة الطويلة اللى انتى قولتى عليها غير كمية الحقد والسواد والشماتة اللى كانوا متداريين ورا ابتسامة كدابة معرفش انتى ازاى كنتى بتدخلى بيوتنا الصراحة وانتى ست وحشة كده".

واختتمت: "نسيت أقولك..السب والتطاول ده بيدل على الأصل.. واحنا بقى ولاد ناس مع اننا عندنا كلام كتير أوى يتقال".

ولم يختلف الحال كثيرًا بالنسبة لوالدة "السقا"، التي دافعت هي الآخرى عن ابنها، وكتبت: "على الأصل دور كومبارس فاشلة تتطاول وتسب فنانين كبار، وتعلق فشلها عليهم، تبحث عن الشهرة بطريقة بذيئة مهما حاولتي يا كومبارس ليس لكي مكان بين الفنانين المحترمين، وإن طلع العيب من أهل العيب ما يبقاش عيب".

يذكر أن حديث الفنانة مها أحمد جاء على خليفة وقف الشركة المتحدة للخدمات الإعلامية، لتعاملها مع المخرج محمد سامي، الأمر الذي أثار حالة كبيرة من الجدل على مواقع التواصل الاجتماعي، وانقسمت "السوشيال ميديا" حوله إلى مؤيد ومعارض، لاسيما بعد الهجوم الواسع الذي تعرض له مسلسله الأخير "نسل الأغراب".

واتهم "سامي" بأنه يحابي لزوجته "مي" على حساب كل المشاركين بالعمل، وأنه كان يمنحها مساحة أكبر من أدوارهما، فضلًا عن وفاة جميع أبطال المسلسل ماعدا هي.