احذر.. مواطن يكشف تفاصيل النصب باسم البنك المركزي المصري

كشف أحد المواطنين، عن تفاصيل النصب باسم البنك المركزي المصري، موجهًا تحذيرًا للمودعين.

وقال في منشور له على مواقع التواصل الاجتماعى: «الساعة 5 مساء اليوم الإثنين 25 يناير جانى تليفون على الموبايل (والتروكولار)، أوضح أنه خدمة العملاء بالبنك المركزي المصرى، وسالنى المتحدث إنت حضرتك لك كارت فيزا وأنا رديت عليه أيوا».

وتابع: «وقال فى حظر على الكارت بتاعك رديت عليه أنا تعاملت على الكارت النهارده ومفيش حظر، وقال لا فى حظر ومن فضلك إحنا خدمة العملاء بالبنك المركزى المصرى وإدينى رقم الكارت بتاعك من الشمال لليمين ، قلت له متاسف رقم الكارت مش حديهولك».

وواصل: «وبعدين بأى صفه إنت بتتكلم؟ رد قال أنا من البنك المركزي المصرى قلت له البنك المركزى لا يتعامل مع العملاء وأنا مصرفى وعارف كويس/ الخلاصة إنى ما إديتوش رقم الكارت واتصلت بخدمة العملاء بالبنك الأهلى على رقمهم الخاص، وبلغتهم بالموضوع ».

واستكمل: «افدونى إن دى عملية نصب وكويس إن حضرتك ما إديتوش أى بيانات، وراجعوا معايا بيانات الكارت وأبلغونى بعدم وجود حظر والكارت شغال /أنا باكتب عشان تعرفوا إن البنك المركزي لا يتعامل مع عملاء».

وختم: «ومفيش حد يدى بيانات خاصة بأرقام حساباته أو كروته لأى حد بالتليفون / رقم التليفون اللى إتصل بى هو 01289058538 وبكل أسف مسجل على (التروكولر) خدمة عملاء البنك المركزي المصرى.. احذروا النصب».