رئيس التحرير
خالد مهران
count
count

صيدلانية بمعهد الأورام: المعهد سيتحول إلى بؤرة لنقل كورونا لهذه الأسباب

الدكتورة هاجر عصام
الدكتورة هاجر عصام العشماوي

كشفت هاجر عصام العشماوي، طبيبة بصيدلية المعهد القومي للأورام، كواليس اجتماع أطباء الصيدلية بالدكتور حاتم أبو القاسم مدير المعهد القومي للأمراض، بأنها وزملاؤها وإدارة الصيدليات، منذ أكثر من أسبوع حاولوا الإشارة إلى أن معهد الأورام سيتحول إلى بؤرة لتفشى الكورونا  في حال عدم إغلاقه لمدة 14 يوما " فترة حضانة الڤيروس"، للقدرة على حصر المصابين من الفيروس جراء الاختلاط الذي تم مع الممرض المصاب، بجانب تطهير المعهد  بالكامل، ثم إعادة سير العمل من جديد بالمعهد بعد انقضاء الفترة الزمنية المحددة.


وأشارت، في منشور لها على "فيسبوك" قائلة:" وطالبنا بعمل screening للتأكد ان محدش عنده كورونا عشان كدة احنا بننشر المرض عشان بيجيلنا مرضى من كل انحاء مصر، بس كنت بنزل لخدمة المرضى انا وزمايلى وواخدين كل احتياطاتنا اللى وفرتهالنا إدارة الصيدلية وتشكر طبعا عليها، عشان ملهمش ذنب فى اللى بيحصل".


وتابعت قائلة: "اجتمعنا  "الخميس ٢ ابريل" مع عميد المعهد دكتور حاتم ابو القاسم بناء على طلبنا من مديرة الصيدلية اللى طبعا شاكرة اخدت منه ميعاد عشان نوصل صوتنا، وفعلا قولناله اننا عاوزين المعهد يتقفل للتعقيم والناس تقعد فى بيتها اسبوعين "اللى هى فترة حضانة الفيروس" لحد ما نعرف بس لو حد تعبان أو بانت عليه أعراض، وهو طبعا رفض وبشدة وكان رده عليا لما قولتله ان احنا كده بنأذي بعض والمرضى وبلد كاملة انه يقول لى: "لو خايفة على نفسك من الكورونا يا دكتورة اتفضلى قدمى استقالتك ومتجيش". 


واستكملت: "ورده على ناس بتناقشه ان الصيادلة رافضين ينزلوا غير لما يتم تعقيم كامل، ان "لو الصيادلة مش هينزلوا هناخد اجراء ضدهم ولو كلهم مش نازلين مش مشكلة هنجيب غيرهم"، دة كان رده  اللى هو كان الخميس ٢ ابريل، كان يوم شغل عادى جدا وكلنا نزلنا الشغل عادى بردو، تمام".


وعقبت على تصريحات مدير المعهد القومي للأورام قائلة: " د/حاتم ذكر ان اتعمل مسحة كاملة على المعهد، ده يا جماعة محصلش وربنا يشهد على كلامى، متعملش حتى مسح لكل للمخالطين بأول حالة شوية منهم بس اللى اتعمل لهم مسح والباقى اتعزلوا فى بيوتهم والله اعلم مين تانى كان اتعامل معاه بس ميعرفوش بالاسم لان المعهد حلقة وكلنا بنتعامل مع بعض بشكل او بآخر "يعنى اكيد فيه carriers ماشيين وسطنا كلنا وبختلطوا بكل الناس". 


ثانيا: د/حاتم ذكر أنه تقرر غلق المعهد ٣ ايام حتى يتم تطهيره، مش دى المشكلة، المشكلة انه بيقول ان المعهد اتقفل ٣ ايام منهم يوم كان اصلا شغل عادى واليوم اللى اجتمعنا معاه فيه عشان نطلب منه يقفل المعهد عشان الموضوع ميكبرش وهو أصر أنه مش هيقفله بس قال هيجيب شركة تعقم المبنى قبل الشغل يوم الجمعة "اللى هو إجازة صيدليات الصرف بس فيه ناس كتير قدروا ينزلوا يفتحوا وفعلا اتعقمت بس انا صيدليتى متعقمتش عشان محدش فينا عرف ينزل الجمعة " فلأ الكلام اللى مكتوب مش صح ولا الاجراءات دى اتاخدت ولا كان عاوز يسمع حد فينا و كان قراراه محسوم بأن الشغل مستمر واللى مش هييجى هيتتاخد ضده اجراء واللى مش عاجبه سياسة المكان يتفضل يقدم استقالته".