دموعي مبتقفش.. رامي جمال يرد على حملات التعاطف معه بعد إعلان مرضه

وكتب رامي: "الحمد لله أولا وأخيرا.. أنا عايز أقول كلام كتير عن اللي شوفته منكم.. كلمة شكرا قليلة على مشاعركم، وعلى رقي كلامكم، وعلى الوقت اللي ضيعتوه علشان تحسنوا الصورة المظلمة اللي كانت في عيني، أنا بقيت شايف الابتلاء ده هدية من ربنا، علشان أشوف الحب ده، والله دموعي مبتقفش، وأنا بشوف كلامكم.. اوعوا تبخلوا على اَي حد بدعم نفسي، زي اللي دعمتوني بيه".

وأضاف: "إحساس الحب بينور الدنيا بيرجع الروح والأمل، إللي انتوا عملتوه ميتقدرش.. ثانيا عاوز أشكر زملائي الفنانين على كل كلمة حلوة وكل دعم شفته، هي دي الروح اللي نفسي تفضل موجودة، مش بس بعد المرض ولّا الوفاة.. الكلام الحلو قولوه على طول، ليا ولغيري، بيفرق جدا الحب بيغير الضلمة لنور".

وتابع: "ثالثا لكل القنوات اللي بتحاول تتواصل معايا من امبارح علشان تطمن عليا، بشكركم جدا بس أنا كتبت البوست ده علشان أنهي حمل على قلبي، مش علشان ابقا تريند، بشكركم طبعا بس أتمنى لما تقرروا تستضيفوني، يبقى على عمل فني مش مرض.. مقدر شغلكم طبعا بس أنا مش قابل فكرة مريض، أنا الحمد لله اتأكدت بكلام الناس إني مش خايف، ومش هترفض، فبلاش اَي حاجة تتفهم غلط، شكرا على اهتمامكم ومقدره واشوفكم في لقاءات فنية بعد نزول ألبومي، ده أفضل نفسيا كتير ليا".

واختتم رامي كلامه بالقول: "ومفيش مانع ساعتها نتكلم عن إني ازاي تعايشت بيه، وهتعايش بيه لو ليا عمر.. الحمد لله على الابتلاء.. الحمد لله على حبكم ودعمكم.. ده دين هعيش بيه، خلصتوني من سجن كنت عايشه، كنت باصحى قبل ما اغسل وشي أعد البقع واشوفها زادت ولّا لأ، النهارده صحيت نزلت وحبيت المحنة اللي ورتني قلوبكم وجمالها.. شكرا من قلب قلبي".

الجدير بالذكر أن المطرب الشاب رامي جمال، كشف في وقت سابق، عن إصابته بمرض البهاق، عقب ظهور بقع بيضاء اللون في مناطق بجسده، قائلا إنه ذهب لعدد كبير من الأطباء، إلا أنهم لم يجدوا حلا لها.