رامي جمال يفكر في الاعتزال بعد إصابته بمرض خطير

فاجأ الفنان رامي جمال، الجميع، خلال الساعات القليلة الماضية، بخبر إصابته بمرض "البهاق"، مشيرًا إلى أنه يفكر في الاعتزال بسببه.

وكتب "رامي"، عبر موقع الصور الشهير "انستجرام"، قائلًا: "الحمد لله الذي أحبني فابتلاني وقدرني على الصبر.. من فترة ظهرت بقع بيضاء في جسمي، وبالكشف عرفت إنه مرض البهاق، وجربت أنواع علاج كتير، ودكاترة كتير، ومفيش فايدة".

وتابع: "رضيت وسلمت أمري لله عشان عرفت إن الزعل بيزوده، وكفاية شغلانتي وصعوبتها والقلق الدائم من المستقبل، وفعلًا بقى بيزيد لدرجة لفتت نظر ناس كتير، اللي بقى يقوللي هتتعامل إزاي وأنت فنان، واللي يخاف يسلم عليا، واللي يسألني هو ده معدي".

واستكمل: "أنا بقالي سنة فعلًا لو عندي حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني أعمله عشان الناس مش هتقبلك كدة، وفكرت في كلامهم بصراحة".

وأضاف: "لاقيت إن عندي حلين يا فعلًا شكرًا لحد كدة على الشغلانة دي، رغم حبي ليها، وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة إن شكله غريب، والحمد لله على نعمة الأهل لأنهم الوحيدون اللي بيقبلوا الواحد زي ما هو".