بالفيديوهات والصور.. نجوم الفن يعلنون موقفهم من الأحداث السياسية الجارية

في ظل الأحداث السياسية الجارية، قرر عدد من النجوم تأييد النظام الحالي بالعديد من الطرق.

وكتب "فلوكس" بعد نشره صورة له كتب عليها: " 30 يونية.. يوم العزة واسترداد الكرامة من جماعة ضالة.. خطفت وطن" وعلق: "شكرا لجميع شهداء الوطن وأهاليهم وأسرهم اللي دفعوا تمن البلد دي.. شكرًا للشعب المصري الواعي".

وأكمل "فلوكس": "شكرًا لجميع القيادات السياسية المحترمين اللي ماسبوش البلد تروح ومؤسسات الدولة اللي وقفوا لحماية البلد دي وشبابها الواعي اللي أنقذوا مصر من الهلاك ورجعوها لشعبها.. شكرا للجيش المصري خير أجناد الأرض وقيادته المحترمين اللي فعلا اكتر ناس محترمة شوفتها في حياتي والشرطة ورجالها اللي بيضحوا لغايت دلوقتي بروحهم علشان البلد دي تعيش وتفضل.. وشكرا للراجل اللي شال حياته على ايده وانقذنا.. ربنا يحفظ مصر وشعبها".

وظهر الفنان الراحل محمود عبد العزير، في الفيديو، وهو يوجه كلامه لشعب مصر قائلا: «فوقوا بقا يا اخونا فوقوا.. يا عالم فوقوا يا مصريين فوقوا اللي بيحصل دا حرام.. انتوا مصريين انتوا.. انتوا حضارة 7000 سنة.. الحضارة اللي عمر ما مصري قتل فيها مصري ليه بقينا بنكره بعض كدا.. ليه بقينا بنذل في بعض كده.. ليه بقينا واقفين لبعض على الواحدة.. لا جوع ولا عدو ولا جن أحمر ممكن يدمر البلد دي.. لكن اللي بيحصل دا هو اللي هيدمرها.. بلدنا حلوة يا اخوانا.. حرام عليكم.. حبوها.. حبوها يا اخونا».

وعلق "محمد" على الفيديو قائلًا: "{حرام عليكوا بلدنا حلوة، حبوها، حبوها} ده اللى علمهولى ابويا و ربانى عليه، أحب بلدى وأحترم الكبير، ولو يوم حد غلط فى بلدى أو فى رئيسها و هو من يمثلها، أكله بسنانى، من حق كل واحد أنه يقول رأيه بحرية، لكن فى حدود الأدب والاحترام، أنت حر ما لم تضر، حتى الحرية لها ضوابط، حسبى الله ونعم الوكيل فى كل من يحاول تدميرنا أو تشتيتنا ولكن فى النهاية [الكلاب تعوى والقافلة تسير] واحنا قافلتنا هاتستمر وهاتوصل بأمان وسلام رغم أنف كل حاقد وكل مأجور، موتوا بغيظكم.. اسألكم الفاتحة و الدعاء لابويا و لكل من رحلوا عنا»

ومن ضمن نجوم الفن الذين شاركوا في الفيديو أحمد بدير، حكيم، هنادي مهنا، محمد لطفي، هاني شاكر، حجاج عبدالعظيم، أحمد شيبة، محمود عبدالمغني، أحمد فلوكس، شعبان عبدالرحيم، محمود عبدالمغني، وحجازي متقال وغيرهم.