الورقي
تحذير هام لكل المارة أعلى الدائري أمام البارون
حذر أحد سكان البارون أعلى الدائري من بعض البلطجية وقاطعي الطرق قبل بوابة البارون؛ بعد تعرضه لمحاولة سرقة.
وكتب الساكن، منشورًا تحذيريًا له على إحدى مجموعات موقع التواصل الاجتماعي «فيسبوك»، قال فيه: «حابب أحذر الناس، عشان محدش يتعرض لنفس الموقف المكان أمام بوابة البارون على الدائرى، الساعة ٢ الفجر، كنت راجع الساعة ٢ بليل بالعربية ونزلت بعد كبري المشاه في البطسء ومهدي وفجأة سمعت صوت خبطة جامده جدا ناحية الباب اللي جمبي بصيت مالقيتش حد خبط فيا أو أي عربية جمبي قولت يمكن العجل فرقع، بعديها بثانية بالظبط وأنا لسة مش مجمع صوت خبطة قوية جدًا تاني والزجاج بتاع الشباك اللي ورا اتدشدش وأنا في حالة صادمة ولسه مش مجمع إيه اللي بيحصل، لقيت واحد بيجري عليا شكله ما يعلم بيه إلا ربنا وواقف ٣،٤ في حتة ضالمة بجوار الكشك مستنين أنزل وفيه عربية واقفة في نص الشارع قافلة الطريق».
وتابع: «قدرت أجمع إن ده كمين وإنهم كانوا بيرموا طوب ضخم على الزجاج وجريت طلعت على الرصيف بالعربية ونزلت بعد العربية اللي واقفة ودخلت البارون بسرعة وأنا في حالة فزع ومكانش بيدور في دماغي غير أن بيتي وعيلتي لا قدر الله كانوا ممكن يتعرضوا للموقف ده والله أعلم كان ممكن يبقى إيه رد الفعل وإيه العواقب».
وختم منشوره قائلاً: «قدر الله ما شاء فعل والحمد لله عدت بسلام وخساير لا تذكر، وكل اللي قدرت أعمله هو محضر إثبات حالة، أتمنى إن كل الناس تاخد بالها وخاصة في الأوقات المتأخرة عشان مبقاش فيه أمان، وربنا يسترها علينا جميعا».
