الورقي
أحمد يونس يوجه رسالة مؤثرة لـ«أكرم حسني» ويكشف عن مفاجأة
بعد تكريمهما بالأمس، في مهرجان الفضائيات العربية 2019، وجه الإعلامي أحمد يونس، رسالة للفنان أكرم حسني، عبر صفحته الشخصية على موقع تبادل الصور والفيديوهات "انستجرام".
وكتب "يونس"، بعد نشره لصورة أكرم حسني: "ما لا تعرفه عن #اكرم_حسني.. أكرم الكل عارفه كموهبة ملهاش حل عنده طلة كده مجرد ما تشوفه تبتسم تلقائى لكن ع المستوى الإنساني أجدع وأرجل صاحب عمره ما بخل عليا بنصيحة دايما أقرفه واسأله لما بيجيلي شغل لأني عارف إن الرد نصيحة بمنتهى الإخلاص.. أكرم أوافق ولا لأ؟.. عمر شهرته ما غيرته".
وتابع: "مر بظروف وأزمات كتير جدا لكن على طول مثابر جدا خفة دمه قدام الكاميرا نسخة طبق الأصل من خفة دمه في الحقيقة بيتكسف لو حد شكر فيه بشكل يخليك أنت نفسك تضحك، فترة شغلي معاه من أجمل الفترات لما بتطلب معاه يسف على أي حد من صحابه أقسم بالله لو هتعيط مش هيبطل لو جالك جلطة حتى دماغه شغالة وأفكاره برا الصندوق دايما إدى فرص لناس كتير جدا ما عندوش تناكة إني أنا بقيت نجم النجوم ولازم أنتو اللي تيجوا وتسلموا والحركات دي أنا ببقا واقف وألاقي جاي من ورايا بكل بساطة وتواضع ولاد الناس الحقيقين يسلم".
وأكمل: "في فترة مشاكل شغلي القديم تدخل برغم مشاغله لانه مش عاوز طرفين يخسروا بعض.. أكرم حسني هو صاحب فكرة اسم برنامج عالقهوة" اللي بعتبره هو نقطة التحول الكبرى في شغلى في الاعلام الكلام ده حقه اني اقوله عنه ودي مش اول ولا اخر مرة هقولو لانه صاحب وراجل محترم وابن اصول بجد وانا اتعلمت ان العرفان بالجميل سمة ولاد الاصل ونكران الجميل سمة معدومي الاصل ربنا يعليك يا حبيبي اكتر واكتر اي نعم الدنيا خدت كل واحد في حته من سنين بس عمري ما انسى جدعنتك معايا".
تفاجأ العديد من الجمهور بمعلومة أن فكرة برنامج "عالقهوة" لأحمد يونس نصحه بها أكرم حسني، وجاءت التعليقات مهنئة لهما على تكريمهما وتميز كل منهما في مجاله بشكل يجعل كل واحد منهما منفردا بمكانة خاصة ليس له منافس بها.
