بالصور| تفاصيل مرعبة في واقعة فقدان طفل من حضانة «انترناشيونال بالتجمع».. وهذا ماسيفعله والده!

روت دينا محمد، منقذة طفل التجمع، تفاصيل إعادته إلى أهله، عبر حسابها الخاص على  موقع التواصل الاجتماعي «فيسبوك»، بعد العثور عليه عقب خروجه من حضانة بالتجمع الخامس، دون أن يشعر به القائمون على الحضانة.

وقالت «دينا»، إنها أثناء عودتها من التجمع الأول وجدت طفلا يسير على طريق سريع تصل سرعة السيارة فيه إلى 80 كيلومترا في الساعة، مرتديًا شرابًا، وكان يبكي، موضحة: «أول ما قرَّبت من الطفل كان بيلعب في الرملة، وكان شكله شيك جدًّا وابن ناس».

وأضافت منقذة الطفل: «سألت الطفل: إنت منين؟ ساكن فين؟ وكان مش بيرد، وترجمت إنه مش فاهمني أصلًا، فكلمته إنجلش وسألت عن اسمه، فقال لي: آدم».

وتابعت: «أخدّت الولد في عربيتي عشان ندور على بيته، وهو كان تايه مش عارف هو ساكن فين، ولقيت بوابين وسألتهم شافوا الولد قبل كده، وبعدين واحد قال لي إنه شاف الولد ده ومامته بتنزله في حضانة إنترناشيونال على أول الشارع، ووصلنا للحضانة وعمّالين نخبّط وماحدش بيفتح، لقيت بقى إنهم مش حاسين بعدم وجود الطفل في الحضانة، واتصدموا لما وجودوه خارجها، وأنا رفضت أسلم الطفل للحضانة وأتي سائق ميكروباص أخبرني بأن الولد كان نائمًا تحت إحدى السيارات منذ فترة، وطلبت الشرطة وحصلت على باباه، واتي والده وقام باستلامه مني».

من جانبه، قال أيمن الألفي، والد الطفل، في مداخلة هاتفية على قناة «on e»: « أنا مش عايز آخد أي إجراء قانوني ضد الحضانة دلوقتي لغاية لما أشوف الكاميرات، ولما اتصلت عليّا مدام دينا ورُحت للطفل أنا حاولت أتماسك شوية، لأني كان ممكن أودّي نفسي في داهية في حاجة زي كده، الحضانة اعتذرت ليّا كثيرًا، لكن أنا كنت في حالة ما يعلم بها إلا ربنا، ومش هودِّي ابني الحضانة دي، ومراتي راحت أخدت كل متعلقاته».