بالصور.. مفاجآت غير متوقعة حول مصدر سيارات محمد رمضان الفاخرة

أثار الفنان محمد رمضان، خلال اليومين الماضيين، حالة واسعة من الجدل عبر "السوشيال ميديا"، بعد طرحه أغنية "الملك" عبر قناته الرسمية على موقع الفيديوهات الشهير "يوتيوب".

وتعرض "رمضان" بسببها لموجة عارمة من الانتقادات، وطالته اتهامات عديدة بالغرور والتكبر وتعمده إهانة زملائه وكل من حوله.

من جانبه، كشف أحد رواد موقع التواصل الاجتماعي "فيس بوك"، ويدعى "إسلام الدمرداش"، مفاجآت قوية عن سيارات الفنان محمد رمضان، زاعمًا أنهم كلهم سيارات مستعملة، اشتراهم من أحد الأشخاص الذين كانوا يقتنون سيارات كثيرة في الإسكندرية.

وكتب "إسلام": "أنا بس مشكلتي مع الفنان محمد رمضان في حاجة، إن الكام عربية اللي هو بيستعرض علينا بيهم دول شاريهم مستعملين من واحد برنس في نفسه كده عندنا في الإسكندرية اسمه ميشيل".

وأضاف: "ميشيل حد تقريبًا عنده قد دوول ٥ مرات حاجات أحدث من كده بكتير، يمكن باعهوملك علشان هو راجل بيركب الأحدث دايمًا، بس اللي انت ماتعرفهوش أن وأنا في إعدادي يعني من ١٥ سنة، كنت باخد درس جنب ڤيلا عم ميشيل الله يمسيه بالخير في سابا باشا على الترام.. وكان عنده Lamborghini Gallardo وFerrari Super America مركونين في الشارع قدام جراچه اللي كل مصر عارفاه".

وتابع: "وحاجات تانية كتير ما وعاش عليها الفترة دي علشان كنت بلعب بيهم لما بأجر ساعة في السايبر Need For Speed قبل اختراع النت وقبل ما يدخل البيوت ونشوف معاليك أنت واللي شبهك، والراجل ولا عمره قال أنا ملك ولا نزل حتى صور ليه جنب عربياته والناس هي اللي بتصوره في الشارع بالصدفة وهو معدي".

وأشار: "ولو على النجومية فمحمد صلاح نجم أكتر منك مليون مرة.. وربنا كرمه بعد ما عاش فترات صعبة في حياته، وعنده استعداد يشتري في السنة الواحدة 10 طيارات ومبيعملش أي حاجة من اللي أنت بتعملها دي.. ولو أنت فنان فـ عمرو دياب فنان برضو وأغنى منك ومشوفناش الإحداث ده منه.. بالعكس الراجل زمان في لقاء ليه قال أنا أول بدلة غنيت بيها كنت سالفها أو مأجرها، مش فاكر بس ده كان لقاء مشهور".

وأكمل: "المهم يعني لو أنت بتتكلم في مستوى الحيتان فأنت قليل أوي وقليل جدًا كمان.. أنت آخرك تطلع تتمنظر على الطبقة اللي شبهنا وحياتهم عادية ومتوقع إننا هنشوفك نازل من الفضاء مثلًا.. بس إحنا شايفينك محدث.. أه والمصحف محدث.. وربنا يشفيك".

يذكر أن الفنان محمد رمضان يخوض سباق عيد الأضحى المقبل بفيلم "الديزل" مع الفنانة ياسمين صبري والفنانة هنا شيحة، وهو إخراج كريم السبكي.