رئيس التحرير
خالد مهران
count
count

بعد الحادثة الخطيرة.. طريقة التأكد من سلامة «إيرباج سيارتك»

ايرباج سيارة_ أرشيفية
ايرباج سيارة_ أرشيفية

حذر أحد أعضاء موقع التواصل الاجتماعى «فيسبوك» من وجود عيب في السيارات يظهر بعد 6 سنين من تاريخ الصناعة، مشيرًا إلى وقوع أكثر من حالة وفاة فى سيارات تنتمي لماركات وموديلات مختلفة حول العالم.

وقال، في منشور له على صفحته الشخصية بموقع التواصل الاجتماعي «فيسبوك»: « بالنسبة لحادثة العربية الاسكودا اللي الإيرباج بتاعتها فتحت في حادثة بسيطة جدا وفجرت عجلة القيادة وطبعا شظايا معدن كتير جوا الطارة قتلت الدكتور الله يرحمه اللي كان سايق، الموضوع طلع فعلا كبير بس احنا اللي عايشين في واقع مش داري بأخبار مهمة شاغلة دول كتير».

وأضاف: « الموضوع بعد بحث طلع إن في شركة يابانية مصنعة للإيرباج اسمها  Takata، الشركة دي بتصنع إيرباج لأغلب ماركات العربيات  مش بس الاسكودا BMW ، Chrysler،  Dodge،  Jeep ،  Ferrari ، Ford ،  Honda ،  Lexus،  Mazda ،  Mercedes-Benz ،  Mitsubishi ، Nissan ،Toyota ، Vw   ،Subaru ،  Cadillac ، GMC،  Pontiac  و غيرهم كتير».

وتابع: «شركة Takata دي اكتشفوا عيب صناعة بيظهر بعد 6 سنين من تاريخ الصناعة، حصل كذا حالة وفاة بنفس الطريقة فى عربيات ماركات وموديلات مختلفة حول العالم كانت أولهم حالة وفاة لبنت 19 سنة في عربية هوندا اكورد، وحصل بعدها كذا حالة نحو 30 حالة تم تسجيلهم حتى 2016 "مش متأكد من عدد الحالات».

وأوضح أن: « شركات سيارات كتير عملت استدعاء لسيارة لتغيير الإيرباج، الحكومة الاسترالية عملت استدعاء إجباري لمالكي سيارات كتير لتغيير الإيرباج والأولوية للموديلات الأقدم وأعلنوا أنهم بنهاية ديسمبر 2020 هيكونوا خلصوا كل استدعاءات السيارات، بسبب شركة Takata يعتبر حصل أكبر استدعاء لسيارات في تاريخ السيارات عموما، الاستدعاء المفروض يكون لأكثر من 40 مليون عربية مختلفة الماركات حول العالم  فيهم 2.5 مليون عربية في أستراليا، ده غير سيارات النقل الكبير والموتوسيكلات والسيارات الرياضية، أغلب ما تم إنتاجه ما بين 1999 
و2017».

واستطرد: «مش كل العربيات اللي اتقالت في البوست فيها عيب الصناعة ده عشان مش كل الموديلات راكب فيها إيرباج من Takata، في قوائم على الإنترنت بماركات وموديلات العربيات، الشركات بدأت تعمل استدعاء بالإيميل للملاك طبعا ده غالبا مش هيمشي مع دولتنا أبدا عشان أغلب الوكلاء ما عندهمش داتا محترمة عن ملاك العربيات غير إن العربيات بتتباع من مالك لمالك وتوكيلات والأغلبية أكيد محدش عارف أي حاجة عن القصة دي وصعب تتبعها في مصر أو للأسف مش هيكون محل اهتمام من الأساس».

واستكمل: « شركات السيارات عملوا أداه على مواقعهم تعرف عن طريقها عربيتك فيها العيب ده ولا لا بس لسه مش كل الشركات نفذت الأداة على المواقع، تعرف عن طريق الـ VIN  
«Vehicle Identification Number» 
رقم تحقيق هوية السيارة ده بيكون عبارة عن 17 رقم موجود في ورق العربية أو في أسفل الزجاج الأمامي ناحية السائق أو في أسفل القايم بتاع السائق لما تفتح الباب، ممكن كمان الكشف عن طريق رقم الشاسية اللي هو عبارة عن آخر7 أرقام في الـVIN».

وأضاف: « الشركات المصنعة للسيارات أكدت أن اللي عنده العيب ده في سيارته هيتم إبلاغه وتغيير الإيرباج مجانا بس في أولوية للموديلات الأقدم اللي هيا أكثر خطورة وللسيارات الموجودة في دول فيها حرارة ورطوبة عالية وعدى على تاريخ إنتاجها 6 سنين تغيير الإيرباج هيكون بدون تكلفة لمالكي السيارات بس طبقا للأولويات الموضوعة من الشركات الأم، ومفيش خطورة على أى عربية فيها العيب ده ولسه معداش على موديلها 6 سنين بس هيكون فيه خطورة في المستقبل».

وأوضح أن: «الخطورة على عربيات موديليها عدى من 6 إلى 9 سنين في الأماكن الأكثر حرارة و رطوبة، وعربيات موديلها عدى من 6 إلى 20 سنة في الأماكن الأكثر برودة، تعريف العيب باختصار إن الإيرباج تم تصنيعه دون مادة جافة تحفظه في حالته الأولية عشان كده بعد فترة الـ6 سنين من تاريخ التصنيع ممكن تصادم بسيط في ظل وجود حرارة ورطوبة عالية يؤدي لتمزق الإيرباج بقوة مضاعفة عن الطبيعي وده بسبب إن الشظايا الموجودة داخل الطارة أو ناحية الراكب الأمامي تسبب إصابات خطيرة أو حالات موت نتيجة ذبح عن طريق الشظايا».

وقال مؤكدًا: «الموضوع مخيف ويستحق الاهتمام مش كلام فاضي، والشركات الكبيرة والدول الكبرى بتدفع ملايين فقط من أجل الاستدعاءات، لازم نكون أكثر دراية وكل جروبات السيارات تبدأ ترتب إزاي يتأكدوا من العيب في العربيات اللي في مصر والتواصل مع الشركات الأم والتوكيل الرسمي عشان تسمح بتغيير الإيرباج لأي عربية فيها العيب أو تم استدعاؤها في دولة تانية، ربنا يرحم الدكتور اللي اتوفى ويصبر أهله، نتمنى الحادث ما يتكررش في مصر تاني».

وأضاف: «اسعى بنفسك للتأكد من سلامة سيارتك عشان ولا دولتك ولا وكيل سيارتك هيعطوا الاهتمام الزيادة المطلوب للموضوع إلا عن طريق ضغط من جميع الملاك وبالتواصل مع التوكيلات الرسمية والشركات الأم».

ووضع طريقة للبحث قائلًا: « ممكن تعمل بحث على نوع عربيتك مع: Takata Airbags Recall ، ممكن تعمل بحث عن 
Which Cars affected by Takata Airbags ! ،Which cars are under recall !».

وأوضح: « توكيل هوندا وتويوتا مصر بالفعل عملوا إعلان في الجرنال من فترة أكثر من سنة وغيروا بالفعل إيرباجات لناس عندها العيب ده،  طبعا يستحقوا كل الاحترام بس مطلوب منهم تنويه بصورة أكبر في الميديا عشان في ملاك كتير مايعرفوش حاجة عن الموضوع 
نتمنى نسمع عن باقي التوكيلات».

وأضاف عضو موقع التواصل الاجتماعي صورة لشرح كيفية معرفة الـVIN في السيارة، وعلق عليها: « ده لينك لمعرفة سيارتك في حالة استدعاء أم لا عن طريق إدخال الـVIN 

التويوتا Toyota 

الاسكودا Skoda

الفولكس فاجن  VW

ده لينك في قائمة بأغلبية السيارات اللي فيها عيب الإيرباج 

وختم منشوره قائلًا: « في بعض ملاك تويوتا تأكدوا أن سياراتهم تخضع لحالة استدعاء والتوكيل طلب منهم الاتصال به لحجز موعد صيانة».