الورقي
بالصور.. مواطن يحذر من التعامل مع شركة «كريم» بعد رفضها التعاون مع الشرطة
وروى «المعداوي» الواقعة قائلًا: « معلش الموضوع طويل شوية بس أنا مش هسيب حقى والموضوع مش كوبى بست ولا مشيره، الموضوع حصلى أنا بنفسى محمود المعداوى.. يوم الجمعة باليل ٢ونص صباح السبت طلبت عربية من شركة كريم عن طريق الموبايل، المهم لاقيت العربية جنبى مفيش ٣٠٠ متر وواقفة مش بتتحرك كلمته بعد ٥ دقايق بقوله أنت فين قالى خلص يا أستاذ وقولى أنت اللى فين، قولت فى بالى معلش ده راجل كبير ومش هكتر معاه ممكن يكون تعبان المهم قولتله مكانى وجه بعد ١٠ دقايق وفعلا كان راجل فى أواخر الـ٤٠».
وأضاف صاحب الواقعة: « المهم فتحت الباب اللى ورا وركبت مراتى وعيالى وبقوله افتح شنطة العربية مردش عليه وفضل يلعب فى الموبايل عليت صوتى لو سمحت افتح الشنطة عشان أحط شنط وحاجات فتحها وهوه مضايق، ركبنا من السيدة زينب ومروح على بيتى لاقيته هيخش من الأوستراد، بقوله لا إحنا هنمشى كورنيش إن شاء الله قالى أنا ماشى بال gps قولتله لا إنساه وأنا عارف الطريق.. لاقيته بيقولى طب منا عارف الطريق وأنا أصلا من السيدة زينب وكنت باكل من عند محل كذا وأنت بتطلبنى وهوه مكشر، قولتله عشان كده اتأخرت علينا ألف هنا وشفا يا عم بضحكه، المهم برضه لاقيته خرج من طريق أبعد قولتله أنت مش قولتلى أنت عارف الطريق والمفروض كنت خرجنا من أبو الريش أنت ليه خرجت من القصر العينى دى أطول بكتير، قالى هوه كده عشان الطريق التانى مكسر، وأنا عند فم الخليك بقوله بس ده طريق طويل، قالى مش خلاص مشينا، قولتله أنت بتتكلم كده ليه أنت مضايق اننا طلبناك وأنت بتاكل ولا إيه بضحكة».
وتابع «المعداوي»: « قالى لو مش عاجبك انزل قولتله هتنزلنى أنا ومرراتى والعيال على الكورنيش ٣ الفجر، لاقيته بيعمل دريفتات ويمين وشمال بالعربية معرفش ليه فمراتى صوتت وشتمته وقالتله اركن راح ركن مرة واحدة وخبط فى الرصيف وبطل العربية وقالى انزلوا روحت قولتله انزل هاتلى الحاجات من الشنطة وخد ميتين ام عربيتك وغور فى داهية.. قالى انزل انت وخلصنى، جيت بفتح الباب لاقيته بيدور العربية ولسه عيالى ومراتى قاعدين قولتله أنت هتعمل إيه لاقيته بيزعق وبيشتم قولتله لا خلاص هات المفتاح ده وانزل معايا خوفت يعمل حاجة، مسك إيديا وقالى سيب المفتاح يابن كذا وكذا روحت ماسك فيه وسحبته من الباب عندى ومنزله على الرصيف».
واستكمل «المعداوي» سرد الواقعة: «لاقيته ضرب ابنى ٤ سنين بالشالوت، وقع ابنى على الرصيف واتعور زى ما فى الصور كده، روحت مكتفه ونازل فيه ضرب فى الشارع وهوه كان ماسك مفتاح وعمال يضرب بيه ومراتى شايلة ابنى التانى ٥ شهور وعماله تصوت ومفيش عربية راضية تقف وكل ده وأنا نايم فوقيه خايف يقوم يضرب حد من عيالى تانى، المهم لاقت واحدة بتصوت فى عربية لما شافت مراتى ولفو بالعربية ونزل منها بنت وأمها و٣ شباب وحاشو ومسكو الراجل بعيد وعرفوا اللى حصل شتموه طبعا ونزلوا الحاجة كلها من العربية ومشووه، طلبولى أوبر لاقيت السواق اللى ضربته واقف بالعربيه قدام راح الـ٣ شباب جريوا عليه وشتموه وقالوله أنت مستنى ليه يابن الكذا وكذا راح مشى بالعربية بسرعة المهم ركبت أوبر وروحت على القسم عملت محضر باسمه ورقم العربية وكلمت شركة كريم حكيتلهم وقولتلهم أنا عايز بيانته كامله رفضوا».
واختتم صاحب الواقعة حديثه قائلًا: « راح القسم بعتنى أنا وابنى المستشفى عشان نعمل تقارير بالخبطاط والكدمات اللى حصلت، ورجعت تانى خدت رقم المحضر اللى فى الصورة ده وقالولى هيروح للنيابة يوم التلات ١٣/٣ وتابع فى النيابة.. طبعا عملولى بعد ٨ ساعات دوخة.. إيه الحل بقى واعمل إيه تانى عشان أنا مش هسيب حق ابنى وحق واللى عمله فينا».
