الورقي
12 تحذيرًا هامًا للراغبين في شراء «شقة» بالعبور والقاهرة الجديدة و6 أكتوبر وزايد
قدم مواطن يدعى، جمال سيد، 12 تحذيرًا هامًا ونصيحة، للراغبين في شراء «شقة» في المدن الجديدة «5 أكتوبر والشيخ زايد والعبور والقاهرة الجديدة»، من خلال تجربته لشراء «شقة».
وقال جمال سيد، في منشور له على مجموعات موقع التواصل الاجتماعي «فيسبوك»: «أولًا: لو هتشترى في الشباب أو مساكن تابعة للجهاز أرجوك أتأكد من ورق الشقة في الجهاز ولو فيها توكيلات خلى صاحب التوكيل يجيلك شهادة من الشهر العقاري اللي عامل فيه التوكيل علشان تتأكد من صحة التوكيل وإنه مش مزور أنا كنت هقع ضحية نصب وأنا بشتري شقة 135 في الشباب لكن راجل محترم فى الجهاز اكتشف إن التوكيل مضروب».
وأضاف: «ثانيًا: لو هتشترى أهالي ياريت تركز في المساحة لأن الموضوع ده في غش كتير جدا يعنى تروح مثلا على شقة 200م ولما تشوفها تلاقيها مش محصلة 120م طبعا المفروض نسبة التحميل تكون 20% لكن أنا شوفت شقق كتير نسبة التحميل فيها تزيد عن 30%».
وتابع: «ثالثًا: بلاش تستعجل في الشراء واستنى لحد ما تلاقى السعر المناسب على سبيل المثال كان فى شقة 135 صاحبها بدأ 520 ومع الوقت نزلها لـ460 وعلى فكرة مفيش حاجة بتتباع بسرعة كل الشقق اللي أنا شوفتها قبل كده لسه أصحابها عارضنها لحد النهاردة».
وواصل: «رابعًا: لو هتتعامل مع مكاتب لازم تخلى بالك وتسأل عن مكاتب محترمة لأن في منهم نصابين ممكن يبيعوك ويلبسوك شقق ورقها مضروب، خامسًا: بلاش تصدق السماسرة في الأسعار لأنهم بيكونوا متفقين مع صاحب الشقة إنه يرفع السعر علشان الفصال وده بردو حصل معايا فى شقة السمسار قال لي آخرها 625 وقعدت أفاصل لحد ما وصلتها 605 بالعافية ولما روحت لقيتها معروضة على الصفحات بـ 60 ألف جنيه قابل للتفاوض».
واستكمل: «سادسًا: لو هتشترى من أهالي أو شركة تأكد إن مفيش مشكلة مع الجهاز وإنك ممكن تركب عداداتك من غير مشاكل، وسابعًا: لو بتشترى من حد شاري قبل كده وخلاص أتأكد من الورق كله تمام ياريت تتأكد من الديون المتأخرة سواء أقساط أو اتحاد ملاك وأوعى تنسى اتحاد الملاك دى لأنها أوقات بتكون أرقام كبيرة».
وختم: «ثامنًا: بالنسبة للروف ده قصة تانية خالص لازم تعرف إن العقد بيكون مكتوب فيه غرف سطح مش شقة وطبعا المفروض إن المساحة القانونية تكون 25% وطبعا أغلب الموجود مخالف حتى لو كان عداد الكهرباء موجود، تاسعًا: اختيار الأحياء مسألة أذواق لكن لازم تراعى ظروفك الخاصة يعنى بعض الإحياء صعب تسكن فيها من غير عربية أو لو أولادك كتير زى حالاتي وكل شوية رايحين درس وجايين من درس يبقى لازم تختار مكان مواصلاته سهلة».
كما شملت التحذيرات من بعض المواطنين: «لو هاتشتري في كومباوند لسه جديد أسأل الأول علي تاريخه وشوف بنفسك مشروعاتهم القديمة، وأوعي تنخدع بالصور التخيلية لأنها غالبًا لا تتحقق، بالإضافة إلى التأكد من قرار البناء الصادر للمشروع لان بعض الشركات بتلم فلوس قبل صدور القرار ومش بتبني وكدة فلوسك ممكن تضيع عليك، فضلًا عن كلام فريق عن بيع أي كومباوند جديد من أنك هتقدر تبيع الشقة بأرباح مئات الأول خلال سنة لأن الاستثمار العقاري محتاج صبر، ولازم تتأكد أنك قادر على سداد الأقساط لمدة 3 سنوات حتى لا تضطر للبيع بدون مكسب».
