كاتم أسرار قاتل قسيس المرج: «بنات المنطقة» سبب عقدته النفسية

فجر صديق المتهم صديق المتهم «حسام علاء الدين ذكي المتولي» 23 سنة، يعمل بإصلاح ماكينات الخياطة، ومقيم أرض يوسف السباعي بكفر الشرفة بالمرج، العديد من المفاجآت عن حياة المتهم، والسطور التالية تحوي على بعض الأسرار التي لم يبيح بها المتهم عن حياته الخاصة.

س/ ما سبب حضورك لسرايا النيابة ؟

ج- أنا جاي عشان أشهد بالي أعرفه عن أحمد سعيد إبراهيم وكمان عاوز أشوفه

س/ وما هي علاقتك بالمتهم أحمد سعيد إبراهيم؟

ج- أحنا أصحاب وزي الأخوات

س/ منذ متى بدأت تلك العلاقة ؟

ج- أحنا أصحاب من سنة 2009، من ساعة لما أنا أبتديت أروح المنطقة هناك

س/ وما هي طبيعة تلك العلاقة تحديدًا ؟

ج- أحنا أصحاب وزي الأخوات

س/ وهل قمت دائم التقابل مع المتهم سالف الذكر ؟

ج- أحنا كنا لحد خمس شهور فاتوا بنتقابل بشكل يومي ومن حوالي الخمس شهور اللي فاتوا أبتدينا نتقابل قليل بسبب شغلي وبسبب أن هو سلوكياته أبتدت تتغير من بعد ما ألتزم في الدين

س/ وما هي طبيعة حياة وسلوك المتهم أحمد سعيد ؟

ج- أنا أول لما عرفته كان شاب عادي، وأبتدينا نتصاحب ونخرج وكنا بنشرب مخدرات، وكنا على طول مع بعض، ومن حوالي سنة قررنا أننا نبطل المخدرات، ونبتدي نركز في شغلنا عشان لو حد عاوز يخطب أو يتجوز، وفعلًا ركزنا في الشغل، ومن حوالي تسع شهور، أحمد أبتدى يلتزم في الصلاة، وكان لما يجي يقعد معانا يقولنا صلوا وبعد كدا أبتدى الموضوع يتطور وكان سريع أوي، ولقيناه أبتدى يلبس جلاليب صغيرة ويعمل خطب في الجامع وفي الشارع ويقعد في الجامع على طول وساب الشغل لأنهم كانوا بيرفضوا أنه يصلي في الجامع لأنه كان بعيد، والموضوع معاه ذاد أوي وبقى بيروح عند الكنائس اللي في المنطقة، ويقرا قرأن بصوت عالي ويقعد يشتم في المسيحيين وفي مرة اتخانق مع قسيس وقعد يشتم والقسيس كمان شتمه، وكان هيتصل بالشرطة، وفي واحد هناك شافه في الشارع وكلمني فروحت حليت المشكلة مع القسيس، وأخدته ومشيت، وكمان كان ساعات بيرمي نفسه في الطين، وفي أخر خمس شهور دول أنا مبقتش أشوفه كتير بسبب الشغل وكمان عشان ميعملش مشكله وأنا أكون معاه

س/ ما هي ظروف المتهم الاجتماعية والمادية ؟

ج- هو ظروفه الاجتماعية كانت سيئة بسبب أبوه لأنه مكانش بيصرف عليه، وكمان بيطلب منه فلوس على طول، لأنه عارف أن أحمد بيقبض كويس، فكان أبوه بيبقى عاوز ياخد أي فلوس معاه، فكان دايما في مشاكل مع أبوه على الفلوس، وبالنسبة لظروفه المادية هو كان بياخد مرتب كويس من المصنع اللي كان بيشتغل فيه، وأهله مستواهم المادي كان تحت المتوسط

س/ وما هو سلوك المتهم في محيط سكنه قبل وبعد الالتزام الديني ؟

ج- قبل الالتزام الديني كان كويس مع كل الناس، بس اللي كان بيضيقه مكنش بيسكت له، ولكن بعد الالتزام الديني كان كويس مع كل الناس برضوا ماعدا المسيحيين، ومش كل المسيحيين، اللي هما مش صحابه بس، كان بيتعامل معاهم وحش وكان لما يشوفهم كان بيرمي عليهم طوب، أو يقوله متعديش هنا تاني، أو يقوله لما تشوفني خش بيتك متقعدش هنا تاني، لكن صحابه المسيحيين كان كويس معاهم، وكنت بستغرب وأقوله يا أبني ما دا مسيحي ودا كمان مسيحي أشمعنا بتعمل كدا مع المسيحيين اللي مش صحابك، وكان يقولي عشان دا كويس وأعرفه

س/ وهل كان المتهم على خلاف مع أحد من جيرانه ؟

ج- لا هو ملوش خلافات مع حد من جيرانه، هو واحد بس كان عمل معاه مشكلة ودا كان بعد الالتزام الديني، والشخص دا كان مسيحيي وكان أحمد أتخانق معاه بسبب اخوه محمد، لأن الراجل كان اشتكى من محمد لأنه كان مشغل أغاني باليل بصوت عالي واتخانقوا مع بعض ودا كان سبب الخناقة الوحيد

س/ وهل كان المتهم دائم الخلاف مع الغير ؟

ج- هو كان بيعمل مشاكل مع الناس لما حد بيضيقه

س/ وما هي طبيعة حياة المتهم أحمد سعيد إبراهيم قبل التزامه الديني ؟

ج- هو كان شاب عادي ومكنش في أي حاجة، وكان بيخرج معايا ومع أصحابنا، وأنا كنت معاه على طول

س/ وما هو سلوك المتهم سالف الذكر قبل التزامه الديني ؟

ج- هو كان شاب عادي وكان بيخرج ويلبس وهو كان بس بيشرب مخدرات، وفي الفترة دي الشباب كلها بتشرب مخدرات، لحد قبل سنة لما قررنا أن أحنا نبطل

س/ وما هي المواد المخدرة التي كان يتعاطاها المتهم أحمد سعيد إبراهيم ؟

ج- هو كان بيشرب حشيش بشكل دائم، وحبوب مرتين تقريبًا الاستروكس، وكان ساعات بيشرب خمرة

س/ وهل ما زال المتهم يتعاطى المواد المخدرة ؟

ج- لا أحنا مبطلين من حوالي سنة

س/ وهل كان المتهم يعاني من ثمة عقد نفسية ؟

ج- قبل الالتزام الديني كان كل مشكلته أن مفيش بنت بتبصله، مع أنه كان بيشتري هدوم غالية، ويحاول يلفت النظر، وكان دايمًا بيقولنا أشمعنا انتوا بتخرجوا مع بنات وأنا لا، وأحنا كنا بنحاول منحسسهوش بالموضوع دا لأنه كان عامله عقده نقص

س/ وما سبب عدم دخوله في علاقات مع الطرف الأخر من النساء ؟

ج- لأن هو مكنش في بنت بتبصله، لأن البنات بتبص لواحد معاه عربية أو مكنة بيخرجها، لكن هو مكنش عنده الحاجات دي، وكمان دا راح اشترى موتوسيكل مخصوص عشان الموضوع دا، ولكن بعد أربعه أيام عمل به حادثة جامدة، ورجله اتكسرت، وركب شريحتين و24 مسمار

س/ وهل ترك أثر سيء في نفس المتهم ؟

ج- أيوة أن الموضوع مبقاش في بنت بتبصله، ودا كان مضايقه جدًا وكان بداية كرهه للمسيحيين جت من هنا، لأن أحنا المنطقة عندنا 90% مسيحيين والبنات اللي كانت مش بتبصله كانوا مسيحيين، وكانوا بيبصوا لأصحابه المسلمين زيي أنا، وبيقول أشمعنا أنا ودي بداية الكره للمسيحيين، وأنا شايف موضوع التزامه الديني دا ابتدء لأنه مكنش شايف نفسه في الحياة اللي عايشها ومكنش حد من البنات بتبصله، ويمكن يكون اتجه للالتزام الديني عشان يلاقي نفسه

س/ وما هي الحالة النفسية والعقلية للمتهم قبل التزامه الديني ؟

ج- قبل الالتزام الديني كان كويس ومفيهوش أي حاجة، وبعد الالتزام الديني كان ساعات بيبقي كويس، وساعات كان بيعمل حاجات غريبة، ويرجع تاني كويس، بس أحمد عاقل ومفيهوش حاجة

س/ ومتى بدأ المتهم في الالتزام الديني ؟

ج- بدأ في الالتزام الديني من حوالي تسع شهور

س/ وما هي كيفية التزامه الديني ؟

ج- هو ابتدى يصلي وبعد كدا بقى يروح الجامع ويلبس جلاليب قصيرة ويقعد وقت كبير في الجامع

س/ وما هي مراحل التزام المتهم الديني ؟

ج- هو موضوع الالتزام الديني تطور معاه بسرعة، الأول كان بيصلي عادي وفجأة ابتدى يلبس جلاليب صغيرة وساب الشغل علشان كانوا بيرفضوا انه يصلي الفجر في الجامع لأن الجامع كان بعيد وكان بياخد وقت طويل وابتدى يعمل خطب في الجامع وفي الشارع وأخر حاجة وصلها أنه ابتدى يتشدد من ناحية المسيحيين، وبيفسر الايات وبيكفرهم ويروح عند الكنيسة ويقعد يقرا القرأن بصوت عالي ويشتم في المسيحيين ويتخانق معاهم

س/ ما سبب التزام المتهم الديني ؟

ج- أنا بيتهيائلي ان أحمد ملقاش سكته في السكة الشمال، فقال يجرب في موضوع الالتزام الديني ويلفت النظر

س/ وهل تتصور ذلك الالتزام الديني اللي تشدد في الدين من قِبل المتهم؟

ج- أيوة هو بعد كدا ابتدى يبقى متشدد

س/ ما هي كيفية حدوث ذلك ؟

ج- أنا فوجئت أنه بقى يتكلم معايا في أنه فسر سور من القرأن ووصل لي أن المسيحيين كفار، وكان بيقعد يقول الكلام دا لكل الناس، ويقعد يقول للناس المسيحيين اللي في المنطقة أنتوا كفار، وبالذات البنات

س/ وما هو رد فعلك تجاه التزام المتهم الديني ؟

ج- في الأول أنا كنت بنصحه ومكنش بيسمعلي فكنت بسكت

س/ وما هو رد فعلك تجاه تشدد المتهم الديني ؟

ج- هو مكنش بيقبل كلامي فأنا كنت بسكت

س/ وما هو دور أسرته تجاه تشدده والتزامه الديني ؟

ج- أهله مكنش ليهم دعوة بأي حاجة

س/ وما هو رد فعل أهالي منطقته تجاه ذلك ؟

ج- الناس لما لقيته بيعمل كدا وبيتخانق مع جيرانه المسيحيين راحوا في يوم جابولوا شيخ لأنهم افتكروا أن هو ملبوس وجاب واحد اسمه الشيخ هشام، وقراله قرأن وبعد كدا قال للناس أن مفيهوش حاجة خالص

س/ وهل كان يتعرض المتهم لسخرية من قِبل البعض ؟

ج- أنا مكنتش بسخر منه لأنه صاحبي لكن بعض الناس في الشارع كانوا بيسخروا منه وبيتريقوا عليه وفي ناس كمان مستغربه أنه أزاي اتغير من واحد بيشرب مخدرات لشيخ

س/ وما سبب تشدد المتهم الديني ؟

ج- أنا معرفش أية اللي وصله أنه يبقى متشدد بس هو كان بيفسر الأيات على مزاجه بالرغم من أن كنا بنقعد معاه، وكنا بنفكره في أيات في القرأن، ربنا ذكر فيها المسيحيين أنهم مش كفار، وكان بيقعد يقول أنا مليش دعوة وهيا كدا

س/ وهل كان لدى المتهم أصدقاء مسيحيين؟

ج- أيوة

س/ وما هو تصرف المتهم معهم عقب تشدده الديني ؟

ج- هو لما كان بيقعد معانا كنت بقوله أشمعنا أصحابنا المسيحيين مش بتتخانق معاهم، وكان بيقول دول أصحابي لكن الناس التانية المسيحيين دول أنا معرفهمش دول كفرة

س/ وهل كان المتهم يقوم بتكفير المسيحيين فقط أم تطرق للديانات الأخرى ؟

ج- هو المسيحيين بس كان بيكفر وكان بينصح المسلمين أنهم يصلوا ويعبدوا ربنا

س/ وما هي مراحل تشدد المتهم الديني ؟

ج- المرحلة دي جت بسرعة لقيناه فجأة بيكفر المسيحيين وبيقعد يشتمهم في الشارع ويزعق معاهم ويرميهم بالطوب

س/ وهل بدر من المتهم ثمة أعمال عنف قِبل المسيحيين نتيجة ذلك التشدد ؟

ج- أيوة هو كان بيتخانق مع الناس في المنطقة ويقعد يزعق ويقولهم ما تعدوش من المنطقة دي تاني، وكان بيروح عند الكنيسة ويقف قدامهم ويقعد يقرأ قرأن بصوت عالي، ولما حد كان بيقوله أمشي من هنا كان بيقعد يشتمه، ويرجع يكمل تاني، وكان بيحدف عليهم طوب، وفي مرة راح الكنيسة وقف على السلم بتاعها اللي بيطلع عليه الناس، واليوم دا كان يوم الحد وكان في ناس كتير في الكنيسة وبعدين الأمن ضربه وخرج قسيس ساعتها من الكنيسة يتكلم معاه فشتموا بعض ومسكوا في بعض والقسيس كان عاوز يبلغ الشرطة بس أنا في الوقت دا حد بلغني وكان ماشي في الشارع وشافوه فأنا روحت حليت المشكلة ومشينا

س/ وما هو سبب تعديه على ذلك القسيس ؟

ج- أول حاجة لما القسيس طلع اتكلم معاه الصوت علي، ومسكوا في بعض، وتاني حاجة هو كان بيكره المسيحيين بصفة عامة ما عدا أصحابه المسيحيين وكان بيكره القساوسة بصفة خاصة لأن هو شايف أن القساوسة هما اللي بيعلموا المسيحيين كل حاجة

س/ وما هو سبب ذلك الاعتقاد قِبل القساوسة ؟

ج- هو كان شايف أن القساوسة جايه من أساس، فهما أساس التعليم المسيحي وهما اللي بيعلموا المبادئ الغلط اللي بتوصل للكفر

س/ وكيف توصل إلى ذلك الاعتقاد ؟

ج- هو فسر الكلمة من نفسه، وقالي متساوية يعني أسيس من أساس تعليم المسيحيين الكفر والمبادئ الغلط

س/ وهل كان له ثمة من أعمال العنف قِبل القساوسة ؟

ج- أنا مشفتش غير موضوع خناقته مع القسيس عند الكنيسة

س/ ومن أين أتى المتهم بتلك الأفكار التشددية ؟

ج- هو مقليش أنا فجأة لقيته كدا

س/ وهل كان يساعده أحد في فهم وتفسير القرآن الكريم أو في توصله لذلك التشدد ؟

ج- لا طول ما هو معايا مكنتش بشوف حاجة زي دي، ولا هو كان بيقول رايح لحد، بس الفترات اللي بيبقي في الشغل أو هو بعيد عني معرفش بيعمل أية بس هو محكاليش حاجة زي كدا

س/ وهل أخبرك المتهم عن نيته في عمل ثمة أعمال عنف تجاه المسيحيين أو القساوسة ؟

ج- لا مجابليش سيرة عن الموضوع دا

س/ هل كان المتهم مرتبط بثمة جماعات دينية أو إرهابية ؟

ج- لا خالص دا هو أكتر واحد بيكره الإخوان دا حتى نزل الاتحادية عشان يمشي محمد مرسي

س/ وكيف علمت بواقعة المتهم بقتل المجني عليه ؟

ج- أنا عرفت من على النت ومكنتش موجود في القاهرة

س/ وما هو رد فعلك حال علمك بتلك الواقعة؟

ج- أنا ساعتها زعلت جدًا وأضايقت ومكنتش متخيل أن أحمد يعمل حاجة زي كدا

س/ وهل كان المتهم يعاني من ثمة أمراض نفسية أو عقلية قبل وبعد التزامه الديني ؟

ج- هو عاقل، بس في الأيام الأخيرة كان غامض معرفش عنه حاجة، ومعرفش بيعمل كدا ليه، بس هو تصرفاته معايا كانت طبيعية جدًا

س/ وهل كان المتهم يتناول أو سبق له أخذ أدوية نفسية أو عصبية؟

ج- لا مكانش في الكلام دا خالص

س/ من خلال معرفتك بالمتهم هل وصلك كرهه إلى أبناء الطائفة المسيحية إلى أن يقتل شخص أو أحد رجال الدين لمجرد انتمائه للطائفة المسيحية ؟

ج- أيوة أنا شايف أن دا ممكن يوصله لكدا خصوصًا أخر خمس شهور

س/ وكيف وقفت على ذلك ؟

ج- لأن أخر خمس شهور، دول المسيحيين بسبب اللي بيعمله معاهم ابتدوا يبصوله بنظره حادة ومنهم اللي ابتدى يسخر منه مباشرة فممكن يكون فكر في كدا، وكمان أنا وباقي أصحابه كنا ابتدينا نبعد عنه شويا بسبب تصرفاته وتشدده وكثرة مشاكله اللي بتيجي بسبب تشدده

س/ ومتى تحديدًا فكر المتهم في القتل أو التخلص من أحد القساوسة ؟

ج- أنا مقدرش أحدد بالظبط لأنه مقاليش حاجة زي كدا، بس أنا بتوقع أن هو لو فكر في كدا يكون في أخر خمس شهور وزي ما قولت قبل كدا

س/ وهل كان للمتهم ثمة خلافات مباشرة مع أحد القساوسة ؟

ج- هو مكنش في غير المشكلة اللي حصلت في الكنيسة لما أتخانق مع القسيس كان القسيس عاوز يطلب له الشرطة، وأنا روحت أحل المشكلة

س/ وأين تتواجد تلك الكنيسة وما هو أسمها ؟

ج- الكنيسة دي قدام الرشاح بس معرفش أسمها

س/ ومن هو ذلك القس الذي حدث معه الخلاف مع المتهم ؟

ج- أنا معرفش أسمه

س/ وهل كان ذلك القس هو ذات المجني عليه الذي قام المتهم بقتله ؟

ج- لا مش هو دا اللي أحمد قتله

س/ وما هي علاقة المتهم بالمجني عليه ؟

ج- هو ما يعرفوش

س/ وما الذي دعا المتهم للتخلص من المجني عليه تحديدًا ؟

ج- هو ممكن يكون شافه في الوقت اللي معاه السكينة فيه، ونتيجة كرهه للقساوسة فعمل كدا في القسيس دا

س/ كيف وقفت على ذلك السبب ؟

ج- أنا اللي عرفته لما رجعت من السفر أن أحمد رايح يصالح أصحاب محل العصير لأنه كان عامل معاهم مشكلة يوم الأربع اللي قبل الواقعة، وكان واخد السكينة معاه عشان لو أتلموا عليه يضربهم، وتكون حماية معاه، وهو شاف القسيس في الوقت دا ونتيجة كرهه للقساوسة عمل كدا وراح قتله

س/ وما قولك في ما هو ثابت في محضر جمع الاستدلالات الرقم 23252 لسنة 2017 جنح المرج والمؤرخ 9 /6 / 2017 والمحرر بمعرفة النقيب محمد صلاح والثابت بيه إبلاغ والد المتهم بتعدي المتهم عليه بالضرب ووضعه للنار عمدًا لمسكنهم وبلاغ شقيقته بتعديه عليها بالضرب ؟

ج- أيوة أنا عارف موضوع الحريق أحمد حكالي عليه، لما قابلته بعد الموضوع بثلاث أيام لما خرج من القسم، بس هو ما ضربش أخته أبوة هو اللي قال كدا

س/ وما هو سبب قيام المتهم بضرب والده وشقيقته ووضع النار عمدًا بمسكنهم ؟

ج- لأن أبوة كان شارط على أخته أنها تتجوز واحد وأحمد كان شايف انه مش كويس، وبيبيع مخدرات، وأحمد كان رافض الجواز، والسبب التاني أن أبو أحمد كان عاوز ياخد منه فلوس، وأحمد في الوقت دا مكنش بيشتغل ومكنش معاه فلوس، وأبوة كان عاوز يطرده من البيت وعلى فكرة هو مضربش أخته وأبوة هو اللي قال كدا

س/ وهل يرتقى ذلك الخلاف لقيام المتهم بوضع النار بمسكنه ؟

ج- هو كان في مشاكل كتير وأحمد كان مخنوق وهو عمل كدا واتلاقيه زهق من أبوة من كتر المشاكل اللي بيعملها معاه
س/ هل لديك خلاف مع المتهم أحمد سعيد إبراهيم ؟

ج- لا خالص

س/ هل لديك أقوال أخرى ؟

ج- أنا يستأذن أنا عاوز أشوف أحمد وأطمن عليه

س/ هل مازال لديك أقوال أخرى ؟

ج- لا

تمت أقواله وتوقع منه

وأقفل المحضر عقب إثبات ما تقدم