بالصور.. فتاة تكشف تفاصيل تعرضها للقنص في محيط الحصري بـ6 أكتوبر

بعد تداول أخبار تفيد بوجود قناص يستهدف المواطنين في ميدان الحصري بمدينة 6 أكتوبر، وانقسام أهالي المدينة مابين مؤكد لهذه الأخبار وبين مكذب لها، وخاصة بعد إصابة الطفل "يوسف سامح المصري" برصاصة فى الرأس في أثناء وقوفه مع زملائه أمام مطعم "جاد".

خرجت إحدى الفتيات التي تعرضت للقنص برصاصة في الظهر وتدعى "دعاء أحمد قاعود" عن صمتها، وزعمت على إحدى جروبات مدينة 6 أكتوبر بموقع التواصل الاجتماعي "فيسبوك"، مؤكدة ما نشر عن وجود قناص بمحيط مسجد الحصري.

وقالت "دعاء": " السلام عليكم. أولا أنا ولا كنت حابة أتكلم ولا أعمل حالة خوف بين الناس بس كل واحد طالع يقول لا الحصري أمان وما فيش حالات غير يوسف أحب أقول لحضرتك أنت بتتكلم أي كلام وخلاص ومش فاهم حاجة".

وتابعت: "أنا الحالة اللي اتصابت قبل يوسف أنا ماكنتش عند جاد أنا كنت في كافيه بردوا في منطقة الحصري وكنت قاعدة حاجة ضربت في ضهري أكيد ماكنتش أعرف إن هي رصاصة غير لما رحت المستشفى واللي بيقول دي إصابة سطحية خضتك دي صورة الرصاصة اللي طلعت من دهري الحمد لله على كل حال واه اتكتبلي عمر جديد بس في حالات تاني غير يوسف وأنا أكبر دليل".

وأكملت "دعاء" حديثها قائلة: "ياريت ماحدش يتكلم على أي حاجة غير لما يكون متأكد من كلامه ماحدش جايب البلد ورا غير إن كل واحد بيتكلم أي كلام وخلاص.. أنا عملت محضر ورحت النيابة واتعرضت على الطب الشرعي واللي مش مصدق يبقي يروح هناك يستفسر بنفسه أنا هنزل صورة التقرير بتاع المستشفى وصورة الرصاصة كمان".

 

وختمت "دعاء" حديثها: بـ"حسبي الله ونعم الوكيل مش بس في اللي عمل كده وكمان اللي ماشي يقول إشاعات".