بالصورة.. وكيل صالح جمعه يرد علي اتهام اللاعب بالسهرات الصباحي

اعرب عبد الرحمن مجدى وكيل اعمال صالح جمعة لاعب وسط فريق الكرة الاول بالنادي الاهلي استياءه من الحملة الشرسة التي يتعرض لها اللاعب في الفترة الاخيرة بشأن التزامه في التدريبات، والسهر لاوقات متأخرة الامر الذي يؤثر علي مستواه الفني. 

 وقال مجدي -عبر صفحته الشخصية علي الفيسبوك-:"هاتكلم لأول مرة باستفاضة في قصة صالح جمعة و التزامه و عدم التزامه لأن بقى زايد عن الحد و مقزز بمنتهى الصراحة و اللي يقرأ، يقرأ للآخر...خلوني أكون واضح جداً، أنا فعلا وكيل صالح جمعة لكن عمري ما أدافع عن الغلط، حصل قبل كده أخطاء من صالح ؟ حصل.. الأهلي عاقبه قبل كده؟ حصل.. و الإعلام كله عارف كده مفيش سر، لكن هل ده معناه ان كل واحد قاعد فاضي مش وراه حاجة يحط اسم صالح في جملة مفيدة انه بيعمل مصيبة ؟ هل عشان خطأه مرة اتعرف أصبح محكوم عليه انه مخطئ مدى الحياة ؟ طب هل تعلم ان مرة أنا و صالح اتفرجنا على مباراة في دوري الأبطال في كافيه، و انا معاه نزل خبر "صالح جمعة يشاهد المباراة بصحبة فتاة أجنبية في أحد الفنادق" .. و طبعا ناس كتير حابة تصدق من معلومات سابقة عن صالح..الصورتين اللي نازلين دول في مكان معروف جداً في مصر الجديدة، مش كباريه في شارع الهرم زي ما شوية الهمج كاتبين، و الصورة باين فيها اسم المكان أكيد فيه منكم يعرفوا.. الشيء التاني انك لو بصيت على الشباك اللي في الصورة اللي عاليمين هاتشوف الدنيا ليل ولا نهار.. 

 طيب الناس اللي قرت الخبر و قررت تخش تشتم و تسب و تحكم انه مش ملتزم و مفيش منه رجا، انا مش هاقول ان صالح ملاك، لكن ليه مافكرتش تبص في الصورة تشوف فيها ايه فاضح ؟ الصورة فيها ٤ ولاد و بنتين، عرفت منين مين صديقة مين و مين خطيبة مين ؟ عرفت منين الساعة كام عشان تحكم انها "سهرة صباحي" خاصة ان الدنيا أصلاً نهار و ده مطعم و بيقفل، عرفت منين انها في كباريه في شارع الهرم ؟ بجد هل ده إعلام طبيعي ؟ و هل ده شكل كبايه؟

 تاني أنا مش بادافع عن الغلط، صالح أو أي بني آدم غيره يغلط لازم يتعاقب، و اللي يشوفه غلطان يصوره معنديش أي مشاكل، لكن اللي بيحصل ده اسمه إعلام همجي.. أنا أفهم ان الهمجية دي بنشوفها من صفحات عالفيسبوك ولا مشجعين، لكن مواقع و مواقع محسوبة انها كبيرة ؟؟".

وكانت صور لصالح جمعه انتشرت اثناء وجوده في بعض الاماكن بصحبة بعض الفتيات الامر الذي جعل الجماهير تهاجم اللاعب علي مواقع التواصل الاجتماعي مما جعل وكيل اللاعب يخرج ليرد علي كل هذه الامور