عمرو سلامة يُحذر من إيفينت "انتحار جماعي" يوم 11 نوفمبر

حذر المخرج عمرو سلامة متابعي ورواد مواقع التواصل الاجتماعي من إيفينت يحمل اسم "انتحار جماعي كمان أسبوع"، يقوم على فكرة ساخرة، حيث حدد القائمون عليه يوم 11 نوفمبر لبدئه؛ رغبة منهم للتعبير عن غضبهم بسبب ارتفاع الأسعار، وتدهور المعيشة وانتشار حالات التحرش وجرائم السرقة، وسيطرة الاكتئاب على صغار السن.

وكتب "سلامة" على الإيفينت: "أنا عارف إن كلامي ده مش هايبقى لطيف ومش ماشي مع النكتة بتاعت الجروب بس لازم أقوله... أنا آخر مرة حد هرج معايا وقال النكتة ديه في قعدة وقعدنا نقلش عليها، انتحر فعلا بعدها بأسبوع".

وأكمل: "كلنا بعدها ضميرنا أنبنا إننا هرجنا التهريجة ديه سوا، طبعا أكيد مانتحرش بسبب التهريجة بس فكرة تشاؤمنا جميعا كده بالتأكيد زودت من معاناته".

واختتم حديثه قائلًا: "طبعا في النهاية كل واحد حر يهرج بالشكل اللي شايفه بيضحكه، بس لو واحد بس من الألوفات ديه خد الموضوع جد، والتهريجة زودت من بؤسه وأقدم على فعل الانتحار فأكيد هاتكون تبعات ده مؤسفة".