مواطن يسرد مهزلة بعد استلام وحدته بمشروع "دار مصر"

قال "معتز الرمادي"، أحد حاجزي مشروع "دار مصر" بالقرنفل بمدينة القاهرة الجديدة، في شكواه:

مازالت المياه مقطوعة لليوم الثالث على التوالي، أطفال و عائلات بدون ماء للمطبخ أو الحمام أو دورات مياه، إحنا محصلناش العشوائيات و الله !!!

وتابع "بالرغم من أن الشقق ليست رخيصة سعرها زي السوق، ده غير الصيانة مدفوع فيها 28 ألف جنيه لكل شقة.

وقدم عدة نصائح للحاجزين المقرر لهم إستلام وحداتهم  الفترة القادمة وقال هذه النصائح بعد تجربة إستلامي في دار مصر القرنفل:

1-جهز نفسك من 80 لـ100 ألف تشطيبات، ده في شقتك فقط، غير الشغل اللي يتعمل في العمارة كلها، لأن السباكة والكهرباء "زفت الزفت".

2-بالنسبة للخطوط الرئيسية المغذية للمجمع السكني من كهرباء ومياه و صرف و غيره، دي بقي واقع وقضاء وقدر محدش يقدر يعمل فيها حاجة، و أدينا شايفين المياه ضربت، بجانب أن هناك سلبيات لن تظهر إلا بعد ما تسكن فيها.

3_شغل النقاشة كله زفت وطلسقة ومسيح على الجدران

،لازم تشغل المحبس الرئيسي لمدة يومين تلاتة لأن المواسير ناشعة ومسربة مياه في الجدران تضرب كل النقاشة في أسفل الجدران، دي مشكلة ملهاش علاج مهما عملت.

4_ متابعة صوت المياه في المواسير والجدران ومن خارج الصرف، لأنها بتضرب في الطوب وبتسرب على الجدران من الخارج.

5_الكهرباء ستجد أطراف كثير ميتة مفيهاش كهرباء، بتحتاج كهربائي يعمل فيها ويأسس أسلاك من جديد.

6_ الأبواب والشبابيك شغل "زفت الزفت"، مش مطبعة ولا مرتاحة، اللي مبيقفلش واللي فالق عن بعضه، من الآخر بتحتاج نجار يشتغلهم كلهم من أول و جديد، حتي دهانهم و لا المساكن الشعبية.

7_الالوميتال بقي قصة تانية، الأبواب مش مرتاحة في الجرار والسوكيت بتاعها، والافقال بتاعتها بلاستيك بتتكسر مع أقل شدة وتتأكل بعد مرتين تلاتة إستعمال لازم تشتغلها كلها من جديد.

8_السلك بتاع الدبان والناموس ضعيف جدا لو لمسته بيوقع ويتقطع، بتحتاج واحد جديد.

9_السيراميك والبورسلين أولا ميوله غلط وفيه عالي وواطي وشكله حيفلق لأن الفواصل مش متعبية أسمنت أبيض كويس وفيه فراغات.

10-سيراميك الأرضيات والحمامات مطبل وفاضي من خلفه، يعني عادي تلاقي واحدة بتتحرك في الأرضية، ومش هاتعرف تعلق حاجة في الحمام إلا لما تنزله كله ويتعمل صح عشان تعلق السخان أو طقم الحمام مراية وفواطة وغيره، و إلا يوقعوا بسبب وزنهم على السيراميك لأن مافيش أسمنت وراه.

11_طقم الصحي حمام وبانيو وغيره، افتح فيهم المياه لأن فيهم تسريب من الجوانب والمصافي مش سالكة كويس، ده غير تطبيع اجزاءهم على بعضهم وعلى الجدران والسبب لما تشوفه هاتعرفه. 

12_طبعا الناموس والدبان محتلين المجمع، والإضاءة ليلا كحل في الحدائق، لازم تجهز نفسك بمصائد وناموسيات لكل الغرف، أنوار السلالم محروقة يعني بالليل بيت رعب.

13_الأسانسير لا يعمل وغير مسموح حاليا بتوصيل تليفونات أرضي لذلك لا يوجد نت. 

14_بوابات العمارات لايوجد عليها قفل فضرورى عمل قفل أمان على باب شقتك إضافي.

وختم قائلا أخيرا الموقع كله صنايعية وعمال كلهم شباب و مستواهم معروف، و بيعملوا قعدات في الجناين وطول اليوم رايحين جايين يبصوا، المهم خد بالك من بيتك لو عندك ستات.