الورقي
مواطنة تشكو من «كارفور».. وتؤكد: سلموني شاشة سامسونج مكسورة
أرسلت علا سمير، أحد المواطنين، شكوى لجريدة «النبأ»، من «كارفور - صن سيتي»، بعد شرائها شاشة سامسونج، وفوجئت بكسر داخلي بها بعد عودتها إلى المنزل.
وقالت في شكوتها: «أنا من عملاء كارفور صن سيتي، فهو أقرب فرع كارفور لمنزلي، ويوم 26 مايو الساعة 2 ونص ظهرًا كنت هناك واشتريت شاشة سامسونج 49 بوصة، واللي كان واقف جربها لي بسرعة جدًا نظرًا لان الدنيا زحمة وصيام».
وأضافت: «سيبت الشاشة يحطوها في الكرتونة ويخلصوا إجراءات خروجها من عند خدمة العملاء وروحت أدفع وبعد كده أخذت الشاشة ومشيت».
وتابعت: «الساعة 7 ونص بليل بشغل الشاشة لقيتها مكسوره تمامًا كسر داخلي، خدتها ورجعت كارفور وطلبت منهم أرجع الشاشة وشبه اترجيتهم أنهم يرجعوها لى لأن المبلغ المدفوع فيها كبير، رفضوا واتعاملوا معايا بمنتهي قلة الذوق وقالوا لي ده سوء استخدام وأعملي اللي تعمليه».
وواصلت: «طلبت مراجعة الكاميرات ورفضوا، طبعا لاني ست (حسبي الله ونعم الوكيل)، ولاني ماليش واسطة اضطريت أكلم سامسونج وقالوا لي تغيير الشاشة هيكلف 6190 جنيه، واتحايلت علي خدمة العملاء يعملوا لي استثناء لاني كلمتهم أطلب معاينة الشاشه وكان لسه الضمان ما اتفعلش أصلا لأني شارية الشاشة من ساعات قليله».
واستكملت: «قالوا لي من ناحية سامسونج ما نقدرش نعمل لك حاجة، كارفور اللي يقدروا يساعدوكي
وكارفور لبسوني الشاشة وخلاص، وشكلهم بدلوهالي
هل يرضي ربنا في كام ساعة أخسر كل المبلغ ده؟.. علما أني روحت كارفور صن سيتي أكثر من مره لحل المشكلة وديا وفي كل مرة يتم التعامل معي بمنتهي قلة الذوق».
وختم شكوتها: «أنا عملت محضر في القسم وأترحل للنيابة العامة وعملت شكوي في جهاز حماية المستهلك
وشكوي في سامسونج مصر
وشكوي في كارفور مصر
وبعت لمجموعة الفطيم
ولسه مش راضيين يبدلوا لي الشاشة».
