رئيس التحرير
خالد مهران
count
count

رسالة مؤثرة من خطيبة «عمرو سمير» السابقة بعد رحيله

عمرو سمير وخطيبته
عمرو سمير وخطيبته السابقة


وجهت إسراء طاهر، خطيبة الفنان الراحل عمرو سمير السابقة، رسالة مؤثرة إليه، بعد وفاته، التي كانت مساء، يوم الأربعاء الماضي، عن عمر ناهز الـ33 عامًا.

ونشرت "إسراء"، مجموعة صور لها مع "عمرو"، عبر حسابها الشخصي على موقع التواصل الاجتماعي "فيس بوك"، وكتبت عليها: "فيه ناس كتير مكانتش بتستوعب أو بتبلع صداقتي أنا وعمرو لمجرد اقتناعهم إن ماينفعش اتنين كانوا مخطوبين يبقوا أصحاب بعد كده.. بس أنا بحمد ربنا إننا عرفنا نبقى كده".

وتابعت: "وبحمد ربنا إننا في الشهرين اللي فاتوا كنا قريبين أكتر من أي فترة في صداقتنا، كانت صداقة ليها شكل خاص جدًا إحنا بس اللي فاهمينه".

وأضافت: "رمضان اللي فات كنت بحكيله إني مش عارفة أقرا قرآن بشكل كافي بسبب التصوير، قعد تقريبًا رمضان كله يشجعني أني أقرا ويفكرني كل شوية، أو يصورلي صورة من الجزء اللي هو فيه ويبعتهالي عشان يغيظني ويحمسني".

وأكملت: " ليلة ٢٧ كلمني مكالمة طويلة أوي وهزرنا كتير واتفقنا على حاجات نعملها بعد العيد، بعدها بدأنا نتكلم عن ربنا وقعد يتكلم عن قد إيه بيحبه أوي وبيزعل لو زعله ونفسه دايمًا يعمل مجهود عشان يقرب منه، قعد يشجعني ويدعمني في حاجات ليها علاقة بكلامنا كان عارف إنها مضايقاني".

وأشارت: "وفي أخر المكالمة قال لي أنا عارف إنك زعلانة عشان مش هتعرفي تصلي التهجد وإنتي في التصوير بس أنا هدعيلك وأنا بصليها، وإنتي برضه أقعدي ادعي وسبحي لحد الفجر وبعد الصلاة كلمني وقال لي دعيتلك كتير أوي".

وكشفت: "على قد ما قربنا أكتر مؤخرًا واجع قلبي دلوقتي، على قد ما هو باسطني عشان مرتاحة إن ماحدش فينا شايل ذرة ضيق من التاني في أي حاجة.. وعشان بحكم مكالماتنا ومسدجاتنا الكتير في رمضان عارفة إنه بإذن الله صامه وقامه إيمانًا واحتسابًا وتقريبًا مفوتش ولا فرصة عبادة وبإذن الله ربنا هيتقبله وده مخليني مطمنة شوية".

ونوهت: " كمان عشان اتكلمنا في حاجات كتير أوي وشوفت قد إيه متغير في حاجات كتير لما كنا بنفتكرها دلوقتي كنا بنقعد نضحك عليها، وشوفت قد إيه بقى دايمًا حريص إنه مايجيبش سيرة أي مخلوق بطريقة وحشة ولا يحكم عليه".

واستطردت: "حاجات كتير اتغيرت في عمرو إلا ٣ حاجات، حبه لربنا، بره لأمه اللي تقريبًا عمري في حياتي ما شوفت زيها، وطيبة قلبه".

ولفتت: "قلبي فعلًا واجعني، واجعني إن الناس تعزيني فيه، واجعني إني بدعيله النوع ده من الدعا، واجعني إن معجباته اللي كانوا يعرفوني زمان يكلموني بيعيطوا، واجعني إننا مستحيل نتكلم تاني وواجعني أوى على مامته".

وختمت حديثها: "هفتقدك أوي يا عمرو، هفتقد هزارنا وكلامنا وهفتقد جدًا جدًا علاقتنا المختلفة اللي بيتهيألي مستحيل يبقى عندي زيها تاني أبدًا، ربنا يصبر طنط ماجدة ويربط على قلبها وينور قبرك ويثبتك عند السؤال ويرزقك الجنة، يا رب تبقى مرتاح أكتر من أي وقت فات، أنت كنت دايمًا حسن الظن بربنا وهو هيبقى عند ظنك به".